និយ័តករទូរគមនាគមន៍កម្ពុជា

មុខងារ និងភារកិច្ចចម្បងនៃការធ្វើនិយ័តកម្មលើវិស័យទូរគមនាគមន៍គឺដើម្បីធានាបាននូវប្រសិទ្ធភាព តម្លាភាព និងគុណភាព និងការផ្តល់ការការពារផលប្រយោជន៍ដល់អ្នកផ្តល់សេវា និងអ្នកប្រើប្រាស់បណ្តាញ ក្នុងវិស័យទូរគមនាគមន៍ និងបច្ចេកវិទ្យាគមនាគមន៍និងព័ត៌មាន ស្របតាមគោលនយោបាយនៃផែនការយុទ្ធសាស្រ្តអភិវឌ្ឍន៍ និងក្របខ័ណ្ឌច្បាប់ជាធរមានដែលកំណត់ដោយរាជរដ្ឋាភិបាល តាមរយៈក្រសួងប្រៃសណីយ៍និងទូរគមនាគមន៍ ជាអាណាព្យាបាលបច្ចេកទេស គឺជាមុខងារនិងកាតព្វកិច្ចចម្បងរបស់និយ័តករទូរគមនាគមន៍កម្ពុជា។ មុខងារទាំងនេះមានសារៈសំខាន់ជាយុទ្ធសាស្ត្រក្នុងគោលបំណងសម្រេចបាននូវគោលដៅអភិវឌ្ឍន៍សហស្សវត្សរ៍កម្ពុជា ដើម្បីរួមចំណែកដល់ការជំរុញការវិនិយោគ និងការអភិវឌ្ឍក្នុងវិស័យនេះ និងចូលរួមលើកស្ទួយសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាពលរដ្ឋនៃព្រះរាជាណាចក្រកម្ពុជា។ ដូច្នេះ វាជាការចាំបាច់ណាស់ដែលភារកិច្ចទាំងនេះ ត្រូវបានអនុវត្តដោយមានការយកចិត្តទុកដាក់ខ្ពស់នៅទូទាំងប្រទេស ដើម្បីបម្រើសេចក្តីត្រូវការរបស់ប្រជាពលរដ្ឋ។

ឥរិយាបទរបស់មន្ត្រីរាជការ និងបុគ្គលិកនៃនិយ័តករទូរគមនាគមន៍កម្ពុជា មានគុណលក្ខណៈស្នូលចំនួន ៤ ដូចខាងក្រោម ដើម្បីបម្រើឱ្យវិនិយោគិនកាន់តែប្រសើរឡើង ក្នុងនាមជាអ្នកផ្តល់បណ្តាញ និងសេវាទូរគមនាគមន៍ និងប្រជាជនជាអ្នកប្រើប្រាស់បណ្តាញ និងសេវា៖

និយ័តករទូរគមនាគមន៍កម្ពុជា (ន.ទ.ក.) មានគោលដៅចូលរួមកសាងវិស័យទូរគមនាគមន៍ និងពត៍មានវិទ្យានៅប្រទេសកម្ពុជាដែលប្រកបដោយថាមភាព និងបរិយាប័ន្នដែលជួយគាំទ្រដល់ប្រជាជនកម្ពុជា ព្រមទាំងលើកកម្ពស់កំណើនសេដ្ឋកិច្ចប្រកបដោយចីរភាព។ ន.ទ.ក. មានមុខងារគ្រប់គ្រង និងជម្រុញភាពត្រឹមត្រូវ ការប្រកួតប្រជែង និងភាពច្នៃប្រឌិតនៅក្នុងទីផ្សារទូរគមនាគមន៍ ដែលអនុញ្ញាតឱ្យអ្នកផ្តល់សេវាមានការរីកចម្រើនទៅមុខ ចំណែកឯអ្នកប្រើប្រាស់ទទួលបាននូវសេវាកម្មទូរគមនាគមន៍ដែលមានគុណភាពខ្ពស់ តម្លៃសមរម្យ និងងាយស្រួលក្នុងការប្រើប្រាស់។ដើម្បីរក្សាឱ្យបាននូវតម្លាភាព គណេយ្យភាព សុចរិតភាព និងក្រមសីលធម៌ ន.ទ.ក. ខិតខំប្រឹងប្រែងរក្សាក្របខ័ណ្ឌបទបញ្ញាត្តិដ៍ត្រឹមត្រូវ ដែលបំពេញតម្រូវការរបស់អ្នកផ្តល់សេវា អ្នកប្រើប្រាស់ និងសហគមន៍ទាំងមូល។ ក្នុងនាមជានិយ័តករទូរគមនាគមន៍នៃប្រទេសកម្ពុជា ន.ទ.ក.ដើរតួនាទីយ៉ាងសំខាន់ក្នុងការតម្រឹមវិស័យទូរគមនាគមន៍ឱ្យស្របតាមគោលដៅអភិវឌ្ឍន៍របស់រាជរដ្ឋាភិបាលកម្ពុជាដែលរួមមានដូចជា ការលើកកម្ពស់សមាហរណកម្មក្នុងតំបន់ និងគាំទ្រដល់ដំណើរឆ្ពោះទៅរកការពង្រីកការតភ្ជាប់ និងវិបុលភាពរបស់ប្រទេសកម្ពុជា។

និយ័តករទូរគមនាគមន៍កម្ពុជាបំពេញបេសកកម្មរបស់ខ្លួន ឆ្លើយតបតាមតម្រូវការរបស់អ្នកប្រើប្រាស់ ប្រតិបត្តិករទូរគមនាគមន៍ និងអ្នកពាក់ព័ន្ធនឹងវិស័យទូរគមនាគមន៍ ស្របតាមគោលនយោបាយរបស់រាជរដ្ឋាភិបាលកម្ពុជា ឆ្ពោះទៅរកដំណើរការសមស្របនៃសមាហរណកម្មសេដ្ឋកិច្ចអាស៊ាន និងសកលភាវូបនីយកម្មក្នុងតំបន់។ បេសកកម្មរបស់និយ័តករទូរគមនាគមន៍កម្ពុជាមានជាអាទិ៍៖

និយ័តករទូរគមនាគមន៍កម្ពុជា (ន.ទ.ក.) ត្រូវបានបង្កើតឡើងដោយច្បាប់ស្តីពីទូរគមនាគមន៍ក្នុងឆ្នាំ២០១៥ និងដើរតួនាទីយ៉ាងសំខាន់ក្នុងការគ្រប់គ្រងវិស័យទូរគមនាគមន៍នៅក្នុងព្រះរាជាណាចក្រកម្ពុជា។ ក្នុងនាមជានីតិបុគ្គលសាធារណៈ ន.ទ.ក. ដំណើរការដោយស្វ័យភាព និងឯករាជ្យពីប្រតិបត្តិករទូរគមនាគមន៍ និងបុគ្គលពាក់ព័ន្ធនឹងវិស័យទូរគមនាគមន៍ផ្សេងទៀត។

គោលបំណងសំខាន់របស់ ន.ទ.ក. គឺធានាឱ្យមានការប្រកួតប្រជែងប្រកបដោយយុត្តិធម៌ ប្រសិទ្ធភាព និងតម្លាភាពក្នុងវិស័យទូរគមនាគមន៍។ ដើម្បីសម្រេចបាននូវគោលដៅនេះ ន.ទ.ក. បង្កើតបទប្បញ្ញត្តិ និងគោលការណ៍ណែនាំសម្រាប់ប្រតិបត្តិការ និងការផ្តល់សេវាទូរគមនាគមន៍ និងបណ្តាញនានា ស្របតាមគោលនយោបាយរបស់រាជរដ្ឋាភិបាល។ បទប្បញ្ញត្តិទាំងនេះត្រូវបានអនុវត្ត និងក្លាយជាក្របខណ្ឌគតិយុត្តសម្រាប់វិស័យនេះ។

បន្ថែមពីលើតួនាទីនិយ័តកម្ម និងអ្នកដោះស្រាយវិវាទ ន.ទ.ក. ក៏តាមដានការធ្វើប្រតិបត្តិការក្នុងវិស័យទូរគមនាគមន៍ផងដែរ។ ន.ទ.ក. ត្រួតពិនិត្យការអនុវត្តអនុលោមភាពតាមបទប្បញ្ញត្តិ ធ្វើអធិការកិច្ចលើការបំពានច្បាប់ដែលអាចកើតមាន និងចាត់វិធានការសមស្រប ដើម្បីរក្សាបាននូវបរិកាសប្រកួតប្រជែងស្មើភាពគ្នាសម្រាប់ប្រតិបត្តិករទូរគមនាគមន៍ទាំងអស់ ។